फिरोज शेख लहान २०७८ श्रावन २८ -
सिरहाको लहानमा लागुऔषध सहित सिटि रिक्सा चालकलाई प्रहरीले लहान -७ बाट पक्राउ गरेको छ । पक्राउ पर्नेमा सखुवानन्कारकट्टि गाउँपालिका ३ परिहारपुरका रिक्सा चालक ३० वर्षीय घुरन यादव रहेको प्रहरीले जनाएको छ । उनको साथबाट लागुऔषध फेनारगन ९७ एम्पुल, नोर्फिन ९७ एम्पुल, डाईजिल्याप ९७ एम्पुल गरी जम्मा २९१ एम्पुल लागुऔषध फेला पारेका छन्। लहान नगरपालिका ७ तिनकुने पार्क मारवाडी सेवा सदन जाने बाटो नजिक इलाका प्रहरी कार्यालय लहानका प्रहरी टोलीले चेकजाँचको क्रममा पक्राउ गरेको जिल्ला प्रहरी कार्यालय सिरहाका प्रवक्ता तथा डिएसपी सुवाष बुढाथोकीले जानकारी दिएका छन् । डिएसपी बुढाथोकीका अनुसार स१ ह ६२५ नम्बर सिटि रिक्सामा यादवले रिक्साको पछाडिको सिट मुनि कालो प्लाष्टिकको झोलामा लुकाई छिपाई राखिएको लागुऔषध भेटिएको हो । पक्राउ परेका यादवलाई इलाका प्रहरी कार्यलय लहानमा राखी थप अनुसन्धान भइरहेको प्रहरीले जनाएको छ ।