फिरोज शेख लहान २०७८ कार्तिक १६ -
लहान नगरपालिका वडा नं-५ का वडा सदस्य मोहम्मद अब्दुल आबिद एमाले परित्याग गरी नेकपा ( माओवादी केन्द्र) मा प्रवेश गरेको २४ घण्टा नबित्दै पुनः नेकपा एमाले पार्टीमा नै फर्किएका छन्। उनलाई लहान ५ का वडा अध्यक्ष सुलेमान मिया अन्सारी लगायत नेकपा एमालेका नेता तथा कार्यकर्ताले स्वागत गरेका थिए। सोमबार लहान ९ मा आयोजित नेकपा माओवादी केन्द्रको शुभकामना आदान प्रदान तथा पार्टी प्रबेश कार्यक्रमा आपसी विवादका कारण नेकपा एमाले परित्याग गरि माओवादी केन्द्रमा प्रवेश गरेका थिए। आबिद पार्टी परित्याग गरेको खबर र फोटो सामाजिक संजालमा आएपछि नेकपा एमाले नगर कमिटि तरंगित भएको थियो। आपसी समझदारी पछि वडा सदस्य आबिद पुनः एमालेमा फर्कदा नेताहरुले एक आपसमा खुशियाली मनाउदै मिठाई बाडेका छन्।