शुभ नारायण यादव - 
सप्तरी, २९ चैत । 
राष्ट्रिय मधेस समाजवादी पार्टीका अध्यक्ष शरत्सिंह भण्डारीले मधेसको समस्या समाधान नभएसम्म मुलुकले निकासै नपाउने दाबी गर्नुभएको छ । रामसपा सप्तरीले मंगलबार राजविराजमा आयोजना गरेको पत्रकार सम्मेलनमा अध्यक्ष भण्डारीले सो दाबी गर्दै राज्यले मधेशीमाथी विभेद गर्दै गयो भने एक दिन मुलुक विखण्डन तर्फ उन्मुख हुन सक्ने खतरा समेत रहेको जिकिर गर्नुभयो । उहाँले विभेदकारी संविधानलाई विखण्डन निम्त्याउने खतरा रहेको भन्दै मधेसी समुदायलाई अधिकार नदिए राष्ट्रियको अखण्डता कायम रहन नसक्ने चेतावनी समेत दिनुभयो । उहाँले २ नं. प्रदेशलाई थाती राखेर निर्वाचन गरिए भने मुलुक विखण्डतर्फ उन्मुख हुने जिकिर गर्दै मधेसीमाथि गरिएको विभेद अन्तका लागि राज्यलाई लचक हुनुपर्ने सुझाव समेत दिनुभयो । 

उहाँले मधेसी समुदायलाई राज्यको नीति निर्माण, कोष र प्रहरी सेनामा समानुपातिक प्रतिनिधित्व हुनुपर्नेमा जोड दिनुभयो । मुलुक अखण्ड रहनुपर्ने र आफ्नोे पार्टी पनि सोही पक्षमा रहेको बताउँदै अध्यक्ष भण्डारीले राज्यले छिटो भन्दा छिटो संविधानलाई सच्याएर सबैको अधिकार सुनिश्चित गर्नतर्फ ध्यान केन्द्रित गर्नुपर्ने बताउनुभयो । एक अर्को प्रसङ्गमा अध्यक्ष भण्डारीले संयुक्त लोकतान्त्रिक मधेसी मोर्चामा आबद्ध केही दलहरुबीच एकताको प्रक्रिया अन्तिम चरणमा रहेको र यसको सार्वजनिक चाडै नै हुने दाबी समेत गर्नुभयो । 

आठ सय कार्यकर्ता रामसपामा प्रवेश

सप्तरीको कोईलाडिस्थित जिरिया हटियामा भण्डाफोर तथा पार्टी प्रबेश कार्यक्रममा फोरम लोकतान्त्रीकका युवा नेता निरज मुक्ति लगायत विभिन्न पार्टी परित्याग गरि उहाँको नेतृत्वमा ८ सय जना भन्दा बढी राष्ट्रिय मधेश समाजवादी पार्टीमा प्रवेश गरेको छ ।रामसपाका जिल्ला अध्यक्ष सतिश कुमार सिंहको अध्यक्षता तथा राष्ट्रिय मधेश समाजवादी पार्टीका राष्ट्रिय अध्यक्ष शरत सिंह भण्डारीको प्रमुख आतिथ्यमा आयोजित सो समारोहमा रामसपाका बरिष्ठ उपाध्यक्ष शेखर कुमार सिंह ,केन्द्रिय महासचिव केशव झा ,केन्द्रिय सचिव गजेन्द्र कुमार मण्डल सहितकाहरुको उपस्थिति रहेको थियो ।पार्टी प्रवेश गर्नेहरुलाई रामसपाका राष्ट्रिय अध्यक्ष भण्डारीले फुलमाला र अबिरले स्वागत गरेका थिए ।