फिरोज शेख लहान २०८१ पुष १९ - 
लायन्स क्लब अफ लहान फुलबारी र मारवाडी युवा मंच लहानको संयुक्त आयोजनामा लहानको शहीद चौकस्थित तरकारी बजारमा शुक्रबार रक्तदान कार्यक्रम भव्य रूपमा सम्पन्न भएको छ। कार्यक्रममा लायन्स क्लब अफ लहान फुलबारीका अध्यक्ष शंकर गुप्ता, संस्थापक अध्यक्ष राकेश झा, सदस्य विजय यादव, मिडिया कोर्डिनेटर फिरोज शेख, तथा मारवाडी युवा मंच लहानका अध्यक्ष राहुल सारडा लगायतका पदाधिकारीहरूको उपस्थिति रहेको थियो। साथै, इलाका प्रहरी कार्यालय लहानकाका प्रहरी अधिकारीहरू पनि कार्यक्रममा सहभागी भएका थिए।कार्यक्रममा नेपाल रेडक्रस सोसाइटी उपशाखा लहानले प्राविधिक सहयोग प्रदान गरेको थियो। रक्तदान कार्यक्रममा २९ जना स्वयंसेवीहरूले रक्तदान गरे। प्रत्येक रक्तदातालाई फलफूल, फ्रुटी, र प्रमाण-पत्रद्वारा सम्मान गरियो। यसै बीच शुक्रबार नेपाल राष्ट्रिय मारवाड़ी युवा संगठनको स्थापना दिवस परेको  उपलक्ष्यमा मारवाडी युवा मंच लहानले रक्तदान कार्यक्रम आयोजना गरेको अध्यक्ष राहुल सारडाले जानकारी दिए। कार्यक्रममा समन्वय गरि सहभागिता जनाएका इलाका प्रहरी कार्यालय लहानलाई लायन्स क्लब अफ लहान फुलबारीका अध्यक्ष शंकर गुप्ता, संस्थापक अध्यक्ष राकेश झाले सम्मान-पत्र सहित सम्मानित गरेका छन। सामाजिक सेवामा योगदान पुर्‍याउने उद्देश्यले आयोजना गरिएको यस कार्यक्रमले स्थानीय समाजमा सकारात्मक सन्देश फैलाएको छ।