फिरोज शेख लहान २०८० कार्तिक १८ - 
सिरहाको भगवानपुर गाउँपालिका वडा नं. ०१ भगवानपुर स्थित हुलाकी मार्गबाट एक जनालाई प्रहरीले लागूऔषधसहित पक्राउ गरेका छन् । पक्राउ पर्नेमा त्रियुगा नगरपालिका-११ का ३३ वर्षीय सन्तोष चौधरी रहेका छन् । उनलाई अस्थायी प्रहरी पोष्ट भगवानपुर सिरहाबाट प्र.स.नि. मुना साहको कमाण्डमा खटिएको चेकिङ टोलीले पक्राउ गरेको हाे । हुलाकी मार्गमा पश्चिमबाट पुर्वतर्फ जाँदै गरेको  स ९ प ८२५१ नं.को मोटरसाईकललाई शंका लागी चेकजाँच गर्ने क्रममा चौधरी पक्राउ परेकाे हाे ।  मोटरसाईकल चालक चौधरीले मोटरसाईकलको सिट मुनि कालो प्लाष्टिकको झोलामा लुकाई छिपाई राखेको लागुऔषधहरु DIALEX-DC लेखिएको– १ बोतल ,फेनरगन लेखिएको ३० एम्पुल, डाईजेपाम लेखिएको ३० एम्पुल , ब्रुफेनोरफिन लेखिएको ३० एम्पुल फेला परेको हुदाँ उक्त लागूऔषध र मोटरसाईकल सहित चौधरीलाई नियन्त्रणमा लिई ई.प्र.का. लहान सिरहाबाट थप अनुसन्धान भईरहेको छ ।