फिरोज शेख लहान २०८२ असार १८ - 
मधेश प्रदेशसभा सदस्य ललिता दास ‘विद्रोही’ माथि सिरहाको लहानमा सांघातिक आक्रमणको प्रयास भएको छ । मधेश प्रदेशको राजधानी जनकपुरधामबाट मंगलबार राती करिब साढे १२ बजेतिर पूर्व पश्चिम लोकमार्ग अन्तर्गत लहान नगरपालिका १ स्थित आफ्नो घर जाने क्रममा एनएमबी बैंक नजिक बसबाट ओर्लिएलगत्तै दुई जना अपरिचित युवाहरुले सांघातिक आक्रमणको प्रयास गरेको उनले बताइन् । ‘बसबाट ओर्लिएपछि दुई जना युवक पूर्वतिरबाट म भएको ठाउँतिर आएर ‘मलाई लखेट्न थालेपछि ५० मिटर दक्षिण रहेको आफ्नो घरतिर दौडिंदै छोरीलाई फोन गरेर गेट खोल्न लगाएपछि  भित्र पस्न भ्याएँ ।’ 

फोनबाट छोरीलाई गेट खोल्न भन्न नभ्याएको भए आफूमाथि जे पनि हुन सक्ने उनले बताइन् । आफू घरभित्र पसेपछि तत्काल इलाका प्रहरी कार्यालयका इञ्चार्जलाई फोन गरेको भएपनि प्रहरी ढिलो आउँदा आफूलाई आक्रमणको प्रयास गर्नेहरु फरार हुन भ्याएको उनको गुनासो छ । ‘म सांसद् भएको व्यक्तिले तत्काल फोन गर्दा त लहान जस्तो ठाउँमा प्रहरी समयमा आउँदैनन् भने ग्रामीण क्षेत्रको अवस्था कस्तो होला ?’ उनले प्रश्न गरेकी छिन   । 

आफूले प्रदेश सदनमा दलित, महिला, अन्यायमा परेका व्यक्ति र तिनमाथि अत्याचार गर्नेहरुको विषयमा कुरा उठाइरहेकाले आफ्नो आवाज बन्द गर्न षड्यन्त्रमूलक ढंगले आक्रमणको प्रयास भएको उनको भनाइ छ । इलाका प्रहरी कार्यालय लहानका प्रमुख प्रहरी नायव उपरीक्षक कैलाश राईले प्रदेश सांसद माथि आक्रमणको प्रयास भएको बारेमा खबर पाए लगत्तै आफूले तत्काल मोवाइल टोलीलाई पठाएको बताए ।‘घटनाको विषयमा सिसिटिभी क्यामेरा रहेका कार्यालयमा फुटेज हेरेर अनुसन्धान गर्छौं’ उनले भने।