फिरोज शेख लहान २०८२ मङ्सिर २७ -
प्याब्सन सिरहाको आयोजना र लहान क्रिकेट क्लवको सहयोगमा लहानमा आयोजित ‘प्याब्सन इन्टरस्कूल क्रिकेट लिग–२०२५’ प्रतियोगिता अन्तर्गत शुक्रबार सम्पन्न दुई खेलमा बेबी एन्जल र लोटस स्कूल विजय भएका छन्। पहिलो खेलमा टस जितेर पहिला ब्याटिंग गर्दै लोर्ड बुद्ध युनिक एकेडमी स्कुलले बेबी एन्जल सामु १५ ओभर २ बलमा अल आउट हुँदै ९० रनको चुनौती प्रस्तुत गरेको थियो। ९१ को विजय लक्ष्य सहित ब्याटिंग गर्न आएका बेबी एन्जलका ब्याट्सम्यानहरुले उत्कृत प्रदर्शन गर्दै मात्र १० ओभर ५ बलमा ३ विकेट गुमाई ९१ रन बनाउदै ७ विकेटको सहज जित निकालेका छन्। खेलको म्यान अफ दि म्याच २ ओभर २ बलमा ७ रन खर्चेर ४ विकेट लिन सफल बेबी एन्जलका अर्नाब्य साह  भएका छन्। 

त्यस्तै शुक्रबारनै सम्पन्न दोस्रो खेलमा टस जितेर पहिला ब्याटिंग गरेको लोटस इंगलिस बोर्डिंग स्कूलले बिबेक गुप्ताको ३५ र जोनी सिंहको २६ रनको मद्दत र ४५ अतिरिक्त रनको सहयोगमा १४९ रन बनाउदै संकल्प विधाशरम स्कुल सामु १५० रनको लक्ष्य प्रस्तुत गरेको थियो। १५० रनको लक्ष्य सहित मैदानमा उत्रेका संकल्पका खिलाडीहरु १६ ओभर ४ बलमा अल आउट भई मात्र ६२ रन बनाउदा ८७ रनले पराजित भएका छन् । खेलको उत्कृष्ट खिलाडी लोटसका विकेश चौधरी घोषित भए। चौधरीले २ ओभर ४ बलमा मात्र ६ रन खर्चेर संकल्पका ४ जना खिलाडीलाई आउट गर्न सफल भएका थिए। प्रतियोगिताको मिडिया पार्टनर शेख मिडिया हाउस प्रा.लि. तथा रेडियो सरगम रहेका छन।