फिरोज शेख लहान २०८२ मङ्सिर २३ -
प्याब्सन सिरहाको आयोजनामा सिरहाको लहानमा जारि ‘ प्याब्सन इन्टरस्कुल क्रिकेट लिग–२०२५’ टी–२० प्रतियोगिता अन्तर्गत मंगलवार  सम्पन्न दुई खेलमा शारदा नमुना एकेडमी र हिमालयन विधा निकेतन स्कुल विजय भएका छन्। मंगलवार सम्पन्न पहिलो खेलमा शारदा नमुना एकेडमीले जी बि शो स्कुललाई १४४ रनले हराउदै विजय भएका छन्। टस जितेर पहिला ब्याटिंग गरेको शारदाले निर्धारित २० ओभरमा ६ विकेट गुमाई नरेन्द्र यादवको ४५ , सरोज यादव र लक्ष्मन यादवको समान ४३/४३ रन र रोहित यादवको ३९ रनको मद्दत र अतिरिक्त ३४ रनको सहयोगमा प्रतियोगिताकै उच्च स्कोर २२० रन बनाउन सफल भएका थिए। 

२२१ रनको विजय लक्ष्य सहित मैदानमा आएका जी बि शो द एलाइट सेकेण्डरी बोर्डिंग स्कुलका फितलो प्रदर्शन गर्दै अतिरिक्त २६ रनको मद्दतमा १५ ओभरमा अल आउट हुँदै ७६ रनमा समेटिएको थियो। जी बि शो का लागि रोशन जयसवालले १३ रन बनाउनु बाहेक कुनै पनि खिलाडिले दोहरो अंक छुन सकेन्। जी बि शो लाई १४४ रनको फराकिलो रन अन्तरले हराउन म्यान अफ दि म्याच घोषित भएका सरोज यादव ३ ,रोहित यादव , लक्ष्मन यादव , नरेन्द्र यादवले २/२ विकेट र सुरेश यादवले १ विकेट लिएका थिए। 

त्यस्तै मंगलवार नै सम्पन्न दोस्रो खेलमा हिमालयन विधा निकेतन स्कुलले शाल्हेश फूलबारीलाई ९ विकेटले हराउदै विजय भएका छन्। टस हारेर पहिला ब्याटिंग गरेका शल्हेशले निर्धारित ओभरमा ५ विकेट गुमाई  प्रकाश यादवको १९, ऋतिक पासवानको १७ र पारसमणि चौधरीको १६ रनको मद्दत र अतिरिक्त १६ रनको सहयोगमा ८८ रनको योगफल तयार गरेका थिए। ८९ रनको विजय लक्ष्य सहित ब्याटिंग गर्न आएका हिमालयन स्कुलका खिलाडीहरुले उत्कृष प्रदर्शन गर्दै सत्यम यादवको १९ र मोहम्मद अरबाबको २६ रनको योगदानमा ८ ओभर ५ बल खेल्दै अतिरिक्त ४५ रनको मद्दतले एक विकेटको क्षतिमा ९० रन बनाउदै विजय भएका हुन्। खेलको उत्कृष्ट खिलाडी हिमालयन विधा निकेतनका नितेश यादव घोषित भएका छन्। नितिशले ४ ओभर बलिङ्ग गर्दै १५ रन खर्चेर २ विकेट लिन सफल भएका थिए। 

२८ निजि विधालय सहभागी यस प्रतियोगिताको सहयोगीका रूपमा लहान क्रिकेट क्लब लहान रहेका रहेका छन्। भने सिराहा जिल्ला क्रिकेट संघ , मधेश प्रदेश क्रिकेट संघ र क्रिकेट एशोसिएसन अफ नेपाल संग सहकार्य गरिएको छ । प्रतियोगिताको  मिडिया पार्टनर शेख मिडिया हाउस प्रा.लि. तथा रेडियो सरगम रहेको छ। यसै बीच प्रतियोगिता अन्तर्गत बुधबार विहान शिवम रेन्वो र लहान मनकामना बीच प्रतिस्पर्धा हुने छन् भने दिउँसो १ बजे बाट हुने खेलमा लक्ष्मी एजुकेशनल स्कुल र एस ओ एस स्कूल आमुने सामुने हुने छन्।