फिरोज शेख लहान २०८२ माघ २५ - 
सिरहाको लहान नगरपालिका–८ मा अवस्थित ‘स्कुल अफ स्कलर्स’ (एसओएस) ले आयोजना गरेको ‘एसओएस विन्टर इभेन्ट–२०८२’ विविध कार्यक्रमसहित भव्य रूपमा सम्पन्न भएको छ। माघ १८ गतेदेखि २३ गतेसम्म सञ्चालन भएको उक्त इभेन्ट अन्तर्गत खेलकुद, अतिरिक्त क्रियाकलाप तथा सृजनात्मक कला प्रदर्शनीका विभिन्न कार्यक्रमहरू आयोजना गरिएको थियो। कार्यक्रमको समापन समारोह नेपाल पत्रकार महासंघ सिरहाका सभापति मनोज बनैताको प्रमुख आतिथ्यतामा सम्पन्न भएको हो। समापन समारोहमा ‘स्कुल अफ स्कलर्स’ सञ्चालक समितिका अध्यक्ष तथा निर्देशक सुदिप कुशवाहाको अध्यक्षता रहेको थियो। कार्यक्रममा विद्यालयका शिक्षक, विद्यार्थी, अभिभावक तथा विशिष्ट व्यक्तित्वहरूको उल्लेख्य उपस्थिति रहेको थियो।समापन समारोहमा इभेन्टमा सहभागी भई उत्कृष्ट प्रदर्शन गरेका विद्यार्थीहरू तथा सहयोगी अभिभावकहरूलाई प्रमाण–पत्र, मेडल तथा कप प्रदान गरी सम्मान गरिएको थियो। पुरस्कार वितरणसँगै विद्यार्थीहरूको प्रतिभा, सिर्जनशीलता र अनुशासनको प्रशंसा गरिएको थियो।

‘एसओएस विन्टर इभेन्ट–२०८२’ अन्तर्गत विद्यालयमा अध्ययनरत करिब ७५० जना विद्यार्थीहरूले सक्रिय सहभागिता जनाएका थिए। विद्यार्थीहरूले विभिन्न खेलकुद प्रतियोगितासँगै खोज, अनुसन्धान र आविष्कारसम्बन्धी प्रदर्शनीमार्फत आफ्नो प्रतिभा प्रस्तुत गरेका थिए। इभेन्टमा ३० भन्दा बढी फरक–फरक विधा समेटिएको थियो। कार्यक्रम अन्तर्गत विज्ञान, गणित, चित्रकला, हस्तकला, साहित्यिक गतिविधि, कविता तथा निबन्ध प्रतियोगिता, हाजिरीजवाफ, हिज्जे प्रतियोगिता, वक्तृत्वकला, नाटक, नृत्यकला, वाद्यवादन, खेलकुद प्रतियोगिता लगायतका विविध गतिविधिहरू सञ्चालन गरिएको थियो। विद्यार्थीहरूले प्रस्तुत गरेका सिर्जनात्मक सामग्री र प्रदर्शनीले अभिभावक तथा अतिथिहरूलाई आकर्षित गरेको थियो।

समापन समारोहलाई सम्बोधन गर्दै प्रमुख अतिथि मनोज बनैताले विद्यालयले शैक्षिक शिक्षासँगै अतिरिक्त क्रियाकलाप र व्यवहारिक शिक्षामा दिएको प्राथमिकता प्रशंसनीय रहेको बताए। उनले यस्ता कार्यक्रमले विद्यार्थीको सर्वाङ्गीण विकासमा महत्वपूर्ण भूमिका खेल्ने उल्लेख गरे।
त्यस्तै अध्यक्ष सुदिप कुशवाहाले विद्यालयले स्थापना भएको छोटो समयमा नै शैक्षिक तथा अतिरिक्त क्रियाकलापमा उल्लेखनीय सफलता हासिल गरेको बताउँदै आगामी दिनमा अझ गुणस्तरीय शिक्षा र नविन कार्यक्रमहरू सञ्चालन गर्ने प्रतिबद्धता व्यक्त गरे।करोडौं रुपैयाँको निजी लगानीमा सुविधा सम्पन्न आधुनिक प्रविधिले सुसज्जित ‘स्कुल अफ स्कलर्स’ मा अनुभवी र दक्ष जनशक्तिबाट शिक्षण–सिकाइ प्रक्रिया सञ्चालन भइरहेको विद्यालय प्रशासनले जनाएको छ। गुणस्तरीय शिक्षा, अनुशासन र प्रतिभा विकासलाई प्राथमिकतामा राख्दै अघि बढिरहेको यस विद्यालयले छोटो समयमै शैक्षिक क्षेत्रमा आफ्नो अलग पहिचान बनाउन सफल भएको छ। समापन समारोहमा विधार्थीहारले विभिन्न जनचेतना मुलक सांस्कृतिक कार्यक्रम समेत प्रस्तुत गरेका थिए।