फिरोज शेख लहान २०८२ जेठ ३१ - 
सिरहाको लहान वजारमा सञ्चालनमा रहेका मासु तथा दुध डेरी पसलको अनुगमन गरिएको छ । शुक्रबार संयुक्त बजार अनुगमन टोलीले अनुगमन गरेको हो ।लहान नगरपालिका पशु विकास संयोजक वडा न.१५ का वडा अध्यक्ष तेज नारायण चौधरीको नेतृत्वमा गएको संयुक्त बजार अनुगमन टोलिले गरेको अनुगमनका क्रममा मासु पसलहरु मापदण्ड विपरित सञ्चालनमा रहेको पाइएको छ। अनुगमन टोलीले व्यवसायीलाई मापदण्ड अपनाएर व्यवसाय गर्ने निर्देशन दिएको छ । लहान वजारमा सञ्चालित अधिकांस मासु तथा दुध डेरी पसल मापदण्ड विपरित सञ्चालन भएको पाइएको छ। नगरपालिकामा सञ्चालन रहेका दर्जनौ मासु पसल र तिन वटा दुध डेरी पसलको अनुगमन गरिएको हो। 

लहान नगरपालिका पशु विकास शाखाको आयोजनामा आयोजित अनुगमन कार्यक्रममा खाद्य प्रविधि तथा गुण नियन्त्रण कार्यालय राजविराजका अधिकृत राजन बुढाथोकी, पशु विकास शाखा अधिकृत रामकृष्ण यादव, घरेलु तथा साना उधोग कार्यलय लहानका बैधनाथ झा, उपभोक्ता संरक्षण हित मंचका जिबछ चौधरी , उपभोक्ता मंचका प्रतिनिधि यमुना खनाल , शेख मिडिया हाउसका अध्यक्ष फिरोज शेख ,ईलाका प्रहरी कार्यलयका प्रतिनिधि ,नगरपालिकाका प्रतिनिधि, पत्रकार तथा सरोकारवालाहरुको संयुक्त टोलीले सदाम फ्रेस मिट हाउस , न्यु थारु मिट हाउस ,न्यु चौधरी फ्रेस मिट हाउस,मुस्ताक फ्रेस मिट हाउस ,लहान फ्रेस मिट हाउस ,न्यु सदाम फ्रेस मिट हाउस ,ललन फ्रेस हाउस एण्ड सप्लायर्स ,शिवम सप्लायर्स ,बिस्मिल्लाह फ्रेस मिट हाउस , श्री न्यु राधा कृष्ण डेरी उधोग ,न्यु राधे राधे डेरी उधोग र माता सन्तोषी डेरी उधोग प्रालिको अनुगमन गर्दा अधिकांश मासु पसल दर्ताबिना नै सञ्चालनमा रहेको, दर्ता भएकाहरु पनि नवीकरण नगरेको, अधिकांश मासु पसल फोहर र दुर्गन्धित रहेको, ढक तराजू व्यवस्थित नगरेको, मूल्यसूची नराखेको पाइए पछि सात दिनभित्र सुधार गर्न सुझाव दिइएको छ। मासु पसलभित्र सेतो टायल तथा चिप्लो भुइँ अनिवार्य गर्न भनिएको छ। साथै, सार्वजनिक नालामाथि मासु बेच्ने पसलेहरुको समान हटाइएको छ। त्यसैगरी अनुगमनको क्रममा भेटिएका तीन डेरीमध्ये दुई वटा डेरीको मापदण्ड नपुगेको पाइएपछि सम्बन्धित व्यवसायीलाई १५ दिन भित्र मापदण्ड पुरा तथा सुधार गरि खाद्य तथा गुण नियन्त्रण कार्यालय राजबिराजमा सम्पर्क गर्न पत्र काटिएको छ।

स्थानीय सरकारलाई नगरपालिका भित्रमा सञ्चालित मासु पसल तथा दुध डेरी पसल मापदण्ड विपरित सञ्चालन गरेको जानकारी भएपनि नियमित रुपमा वजार अनुगमन भने हुन सकेको छैन । सार्वजानिक रुपमा गरिने मासु व्यापारले कानुनी मापदण्ड पुरा नगरेकाले पनि स्थानिय तहले ति मापदण्ड विपरितका मासु पसलहरु लाई कानुनी दायरामा लिन सकेको छैन । जसका कारण मासु पसलहरुले व्यापारका नाममा उपभोक्ताहरुको स्वास्थ्यमा खेलवाड गरेको उपभोक्ताको भनाई रहेको छ । स्थानिय प्रशासन तथा स्थानिय तहहरुले मासु पसलहरुको व्यावस्थापनका लागि व्यावस्थापन भन्दा पनि अनुगमनको पाटो लाई मात्रै ध्यानमा राख्दा उपभोक्ताहरुले झिँगा भन्केको मासु खानुपर्ने वाध्यता रहेको छ।अनुगमन टोलीले विहिबार भेटेरिनरी औषधि पसलहरुको अनुगमन गरेको थियो।